Su Ballu 'E Su Fogu

Los an falados a fogu sos montes de idda mia

a crabobe alluttu ebbia an reduidu su logu.
In s'ierru s'astraòre totu cantu at ruinadu
sa pastura nd'at sicadu at distrutu su laòre,
cussu nordicu rigore at batidu annada mala,
e arrivan da ogn'ala lamentos de carestìa.
Los an falados a fogu sos montes de idda mia
In s'istìu est arrivada sa desertica sicagna,
mancu s'aria de muntagna podet esser respirada,

e sa zente est ispantada de ider cussu sicore,
cun totu custu calore parimus in Algerìa.
Los an falados a fogu sos montes de idda mia
a crabobe alluttu ebbia an reduidu su logu.
Epuru b'at zente indigna chi a su male azunghet male,
cun d'un'ira criminale at brujadu sa Sardigna,
razza perfida, maligna, sa chisina at semenadu,
in Barbagia, in Barigadu, Nurra, Sulcis, Baronìa.

Los an falados a fogu sos montes de idda mia
Impunidos sos balentes sa natura sun bochinde,
a desertu reduinde, suni tancas e padentes,
cussos crobos puzzolentes, cheren totu avvelenare,
los devimus isolare che canes peri sa ia.
Los an falados a fogu sos montes de idda mia
Los devian cundennare a brujare lentamente,
subra su crabone ardente, finas a si ch'istudare,

in manera chi proàre potan cussu bellu giogu,
in manera chi in su fogu lassen sa piromania.
Los an falados a fogu sos montes de idda mia
Como azis totu brusiadu e tantas vidas distrutu,
como chi azis allutu su irde chi fit restadu,
ite azis balanzadu ischifosos assassinos?
Miserabiles cainos, morzedas in agonìa!
Los an falados a fogu sos montes de idda mia

Poberitos innozentes, miserina cussa sorte
ohi, ite cudrele morte sos cudreles bos han dadu,
in piantu hana lassadu isposas, mamas e fizos,
a pagare sos fastizos de cussa zega manìa.
Los an falados a fogu sos montes de idda mia
De su rimorsu in su lettu non potana reposare,
e in cella a frazigare, los lassene a abba e pane,
arrabbiados chei su cane chi sian de su dolore,
infines unu puntore chi nd'isperdat sa zenìa.
Los an falados a fogu sos montes de idda mia
Sardigna, terra brujiada, terra 'e fogu e de afannos,
non permitas custos dannos, lassa istare su sufrire,
impresse faghe fuìre disonestos e foghistas,
chi t'an semper, egoistas, ispulpadu sende bìa.
Los an falados a fogu sos montes de idda mia